Umunyezamu mpuzamahanga wa Mozambique, Ernani Siluane, w’imyaka 27, ari mu nzira aza muri APR

Uyu munyezamu w’ikipe y’igihugu ya Mozambique “Mambas” yasezeye ku ikipe ya Black Bulls mu mukino wa nyuma bakinnye na Chingale de Tete, umukino Black Bulls yatsinzemo ibitego 3-0.

Ernani avuye muri Black Bulls aje gukina mu Rwanda , aho azaba akinira ikipe ya APR.

Nyuma yo gukinira Clube Ferroviário de Maputo, ari na ho yatangiriye umwuga we w’umupira w’amaguru, yimukiye muri União Desportiva do Songo mu mwaka wa 2018. Muri iyo kipe ni ho yabaye umukinnyi watwaye igikombe cya shampiyona ya Mozambique mu 2022.

Nyuma yaho, uyu munyezamu yaje kwerekeza muri Black Bulls, ikipe yafashije gutwara Igikombe cya Mozambique mu 2023. Mu mwaka wakurikiyeho wa 2024, yongeye gutwara shampiyona y’igihugu ari kumwe na Black Bulls.

Yanatwaye ibikombe bibiri bya Super Cup ya Mário Esteves Coluna: icya mbere mu 2024 batsinze Ferroviário da Beira, ndetse n’icya vuba mu 2026 batsinze ikipe yahozemo ya União Desportiva do Songo.

Siluane yanakinnye amarushanwa abiri ya Africa Cup of Nations (CAN): yabanje gukina ayabereye muri Côte d’Ivoire, ndetse n’ayaheruka kubera muri Maroc, aho yarinze izamu ry’ikipe y’igihugu ya Mozambique kugeza bageze muri 1/8 cy’irangiza cy’iryo rushanwa rikomeye muri Afurika.

Byongeye kandi, yanaserukiye Mozambique mu marushanwa ya CHAN yabereye muri Algeria.