Menya indwara yastroke aho Miliyoni 12 bayirwara buri mwaka, abarenga miliyoni 6 bakahasiga ubuzima

Indwara ya stroke ikomeje kuba imwe mu zihangayikishije isi mu rwego rw’ubuzima, aho imibare yerekana ko abantu barenga miliyoni 12 bayirwara buri mwaka ku isi, muri bo abarenga miliyoni 6 bagapfa, naho hafi miliyoni 5 bagasigara bafite ubumuga burambye. Iyi ndwara ifata ubwonko iyo amaraso ajyayo ahagaritswe cyangwa imitsi igaturika, bigatuma igice cy’ubwonko cyangirika vuba.

Raporo zitandukanye zigaragaza ko hafi 85% by’abarwara stroke batuye mu bihugu bikiri mu nzira y’amajyambere, aho serivisi z’ubuvuzi zitaragera kuri bose ku buryo buhagije. Ku bijyanye n’imyaka, abantu bafite imyaka irenga 60 ni bo bayirwara cyane (barenga 60% by’abarwayi), ariko n’urubyiruko ruri munsi y’imyaka 50 ruri kwiyongera, aho rugera ku gipimo cya 10–15% by’abarwayi bose. Impamvu nyamukuru zibitera zirimo imirire mibi, umuvuduko ukabije w’amaraso, kunywa itabi n’inzoga nyinshi ndetse n’imibereho idakora imyitozo.

Ku bwoko bwa stroke, Ischemic stroke ifata hagati ya 80–85% by’abarwayi, mu gihe Hemorrhagic stroke ifata 15–20% ariko ikaba ari yo iteza impfu nyinshi vuba, cyane cyane iyo ititabiriwe mu masaha ya mbere y’ikorwa ryayo. Abaganga bagaragaza ko amasaha ya mbere (3 kugeza kuri 4.5) ari ingenzi cyane, kuko ari yo ashobora kugena niba umurwayi arokoka neza cyangwa asigara afite ubumuga bukomeye.

Inzobere mu buzima zishimangira ko nubwo stroke ari indwara ikomeye, ishobora kwirindwa mu buryo burimo kugenzura umuvuduko w’amaraso, gukora imyitozo, kurya indyo yuzuye no kwirinda ingeso mbi, kuko kwirinda ari byo byiza kurusha kuyivura.