Ibrahim Traoré yavuze ko Burkina Faso igomba kwibagirwa demokarasi ituruka mubihugu byiburengerazuba.

Kapiteni Ibrahim Traoré, uyoboye Burkina Faso nyuma yo gufata ubutegetsi bwa gisirikare, yavuze ko abaturage bagomba “kwibagirwa” demokarasi, nyuma y’amezi atatu gusa guverinoma ye isesheje amashyaka yose ya politiki muri icyo gihugu cyo muri Afurika y’Iburengerazuba.

Mu kiganiro kirekire yagiranye n’abanyamakuru kuri televiziyo ya Leta ku wa Kane, Traoré yavuze ko Libya ari urugero rw’igihugu aho abantu bo hanze bagerageje “gushyiraho demokarasi” ariko bikarangira binaniranye.

Yagize ati: “Abantu bagomba kwibagirwa ikibazo cya demokarasi. Tugomba kuvuga ukuri: demokarasi si iyacu.”

 Traoré yavuze ko “demokarasi yica”.

Yakomeje agira ati: “Murebe Libya, ni urugero rukomeye ruri hafi yacu! Ahantu hose ku isi bagerageza gushyiraho demokarasi, bikorwa binyuze mu maraso… Demokarasi ni ubucakara…”

Ibi ni ikimenyetso gishya cyerekana ko guverinoma ya Traoré iri kugenda yitandukanya n’amasezerano yari yaratanze mbere yo gusubiza igihugu ku murongo wa demokarasi.
Traoré yafashe ubutegetsi muri Nzeri 2022, nyuma y’amezi umunani gusa habaye indi coup d’état yari yaragize uruharemo, yahiritse guverinoma yari yaratorewe n’abaturage ya Perezida Roch Marc Kabore.

Ubutegetsi bwa gisirikare bwari bwasezeranyije kurwanya imitwe yitwaje intwaro ifitanye isano na Al-Qaeda na Islamic State of Iraq and the Levant, imaze gukwira mu gihugu kandi igenzura ibice byinshi byacyo. Ariko igihugu cyakomeje kugabwaho ibitero kenshi, ndetse n’abaturage babarirwa mu bihumbi byinshi bakaba baravuye mu byabo.

Traoré, umaze gukundwa cyane n’Abanyafurika baba hanze y’umugabane kubera amagambo ye arwanya ibihugu by’Iburengerazuba, yari yarasezeranyije gutegura amatora mu 2024. Nyuma y’umwaka umwe, yahinduye icyo cyemezo avuga ko amatora atazaba kugeza igihe ibice byose bya Burkina Faso bizaba bifite umutekano uhagije kugira ngo amatora abe.